الله يخليه

[اسير الصمت]

الله يوفق مثلك الله يخليه.
........................كانك نويت الصد والهجر وياه

غالي ولك بالقلب شي ومخفيه
.......................اكبر من اللي بالضماير تهقواه

في غيبتك قلبي ترى الهم صاليه
......................واسهرت ليلي بين ونه وويلاه

البارحه طيفك مع الليل احاكيه
......................يشهد علي الليل والنجم يصغاه

يا مانسيت اللي من الناس نغليه
........................ولاعاد به شي ليا حل طرياه

استر عيوب الناس والطيب ابديه.
...................وش خانت اللي ماسترعيب رفقاه

امسٍ وقبل البارح القلب اهنيه.
......................امسي مع الفرحه وصبّح بفرحاه

في شوفتك افرح مع اللحن اغنيه
.........................وطيفك يسلي كل طرقٍ بمغناه

قلبي كثير اللي من الناس ترجيه
......................وانا الذي قلبك من الناس يرجاه

لاتحسب ان الصد صعبٍ تحديه
.......................ترى الزمن يشكي ومثلي تحداه

انشد وتلقى الليل تقصر مساريه
.................صدر الزمن يشكي من اقصاه ودناه

راحت هجوسك مبعده في هقاويه
.....................انشد جبال اطويق واللي ترقاه

تلقى زمانك قاصرات ٍ لياليه
.....................هذا الصحيح وتدمع العين فرقاه

وانت الذي لاضاق صدره نراضيه
...................نتعب على شانه على شان نرضاه

ولا انت تدري من زعل عيب اصافيه
.....................يادارس اطبوع المشاعر وتدراه

يا ما لقيتك تشكي الهم تشكيه
..................وجهك عبوسٍ تشكي الحظ برداه

ياللي خذيت القلب وشعادكم فيه
....................رده ترى قلب العنا وافي اشقاه

انا عشقت وعشقي محدٍ يظاهيه
................جيتك على الفطره وذ القلب يغشاه

في كفي سيفٍ للعواذيل مرهيه
................وفي صدري درعٍ لسهوم المصلاه

ياقلبي الليله على وادي التيه
...................جريت ونه والف ونه من الأه

اسمع صدى صوت المعنا بتاليه
....................اضحك واقول الله يعين الذي تاه

والحق انا اللي تايهٍ في دواهيه
.......................مجراك نار تكوي القلب تكواه

باغيه قلبي والمشاعر تناديه
........................قلبي عشق قلبه مع الليل ناداه

مثل البواخر لا رست في مراسيه
...................حبك رسا صبح ومسا ابكل مرساه

بين الظلوع الحدب حبه ابنيه
....................واكتب عليه من الغلا شي يزهاه

لكنّ كيف القلب هذا امتناسيه
...................ياصرح مدري جرح ياجرح ودواه

يمكن صواديف الليالي تحاديه.
...........................ولاّ تغلا والغلا في مزاياه

لكنّ قلبي ماصبر ليل مشقيه.
.......................دنت هجوسي والبلا في محاتاه

همٍ على قلبي وهمٍ يباريه
...................... .ولا جروح القلب صعبه تبراه

البارحه قلبي من اللي يداويه
.......................ياكود وجهٍ يبري الجرح ملفاه

هلّت دموع العين هلّت غواديه.
.....................على الذي قلبي من الناس بداه

ترى الوفا والطيب حق ٍموّفيه
......................ترى الغلا والحب حق موّفاه

من باعني بعته وتقصر خطاويه
................مدعي عليه ادعي عسى الله يرعاه

وانا الذي من يشري القلب شاريه
.......................هذا محله قلبي واسعد بلقياه

اقلّطه في صدر قلبي وهلّيه
..................ارحب هلا واهلاٍ وننحر له الشاه

ونقدّم الفنجال والهيل حاليه
...................اشقر مقره من ورى الهند مجناه

من قدّم الطيبه نرفّع معاليه.
..................ومن قدّم السيّه مع الدرب دسناه

ادعيك من قلبي وانا الغير مدعيه
.................مشتاق انا والشوق وشلون ابنهاه

في داخلي حربٍ من الشوق مذيه
..................والصبر طعمه مر وكيف اتحلواه

من لايعرف الحر لاشك يشويه
.............اخطيت في حقي وانا ارجيك رجواه

انا الذي منهو رقا فوق اوطيه
........................عليك ياللي كل رجمٍ تعلاه

لا تحسب اني بسهر الليل مقضيه
...................جاتك مثايل وفهم القول وقراه

رادي ومثلي لاحشى ما ترديه.
..................درب الردى لارحم منهو تمشاه

ياللي تقول الحب وافي ومرخيه.
.................حبل الوفا تقصره وشلون ترخاه

الحر لامن فز يكفخ جناحيه
..................انا عزيز النفس واللي ورثناه

المرجله والطيب لازم نقديه
....................ماني شحيحٍ تايه ارداه برداه

اللي رقا للخير ربي يجازيه
..............جعله بخير وراعي الطيب حياه

اسقاه من ظيم الليالي ومسقيه
..................همٍ وكل همٍ موفّي زواياه

الصدر لا من ضاق بالقاف اواسيه.
..............شاعر وومّر كل شطرٍ كتبناه

اكتب حروف الشعر من كيفي ووفيه
..............والشعر وهبه والعفو ماشريناه

وغيري كثير الناس لشعر تنخيه
............الناس واجد ياهل العرف تنخاه

لامن كتب بيتٍ تعزوا بعزاويه
...............مسكين ياللي كل شطرٍ تبناه

وانا احمد الله كل شطرٍ موازيه
...............لاطاح شطرٍ قام خيّه توازاه

العقل وافي واحمدلله مكسيه
............بالطيب والمعروف حنا كسيناه

حاضر بحاضر ياهل الحسد اسويه
..........والموت حقٍ يحصد العمر يفناه

متين شطرٍ وافي العرف محصيه
.........ساعه وثلث الطرق حنا بدعناه

وختم قصيدي عد ماهب ذاريه
.........على النبي اللي طريقه مشيناه